Textprobe aus "MAXL, der Zwerg aus der Grottenbahn Es war amal a kloaner Zwerg, hat obn gwohnt am Pöstlingberg, und wia des is mit de kloan' Leut, ja des erzähl ich euch grad heut. Der kloanste von der Zwergnschar, ja sicher unser Maxl war: de Augn blau, an blondn Schopf, a rote Zipflhaubn am Kopf. De Joppn braun, a grüne Hosn Und auf der Nasn Sommersprossn, sei Hemd, des hat er oft zerrissn und immer wollt er alles wissen: Warum der Mond am Himmel steht, wo d' Sunn dann is, wann s' untergeht, für was a Fisch de Flossn hat und wia s' so is, de Linzer-Stadt. Sei größter Wunsch, des waa halt grad, er wollt so gern amal in d' Stadt, doh d' Muatter moant, er soll nuh wartn, er geht doh erst in'n Kindergartn. Dort bei de Kinder is's ja schön, sie därfn oft spazierngehn. Am langen Seil mit Schlupfn dran, da hängt sih jedes Zwergerl an. Und des muaß sein, daß's net passiert, daß sih a Zwergnkind verirrt. Laßt oaner aus, vor lauter Redn, dann is's bestimmt der Maxl gwen. usw. ......